Ibi in hanc sententiam locutus est Quinctius: «Etsi nullius noxae conscius sum, tamen summo cum pudore in conspectum vestrum processi. Hoc me pudet Aequos et Volscos ad moenia urbis Romae impune armatos venisse. Si culpa in consulibus est, imperium indignis auferre vos decet et, si id parum est, insuper poenas expetere: si in vobis, Quirites, vosmet tantum vestrorum peccatorum paeniteat. Totiens fusi fugatique a nobis, illi non vestram ignaviam contempserunt, nec suae virtuti confisi sunt: discordia ordinum et patrum ac plebis certamina sustulerunt animos. Pro deum fidem, quid vobis vultis? Tribunos plebis concupistis"; concordiae causa concessimus. Decemviros desiderastis; creari passi sumus. Decemvirorum vos pertaesum est; coegimus abire magistratu. Tribunos plebis creare iterum voluistis; creastis'. Qui finis erit discordiarum? Hostem nemo submovit: in nos viri, in nos armati estis!.
